XHORHA – Zivulwa nje izikolo emveni kweholide zobusika isikolo samabanga aphantsi i-Elliotdale Village J.S.S. siwelwe ngumqa esandleni.
Inkampani enkulu yabakwaAckermans Clothing Retail Company(Ackermans) neyinkampani eneempahla zonongqiza ichithe imizuzu engamashumi amathandathu anesixhenxe(67) kwisikolo esikumbindi wedolophu yaseXhorha.
Usuku lwanamhlanje lubhiyozelwa mbombo zone zomhlaba. Olusuku lunephulo lokutshintsha iimeko zabantu ngokuthi umntu achithe imizuzu engama-67 esenza okuhle ngelokuhlonipha igalelo lowasekuba ngumongaleli weli loMzantsi Afrika wentando yesininzi utata wethu uNelson Rolihlahla Mandela.
Oonongqiza bebemomotheka luncumo, becula ingoma yabo yemihla-ngemihla u”Ngena Noah” wemvumi ephume iizandla ephondweni leMpuma Koloni uBetusile Mcinga.
Onomngqushwana baye baxhamla ngolusuku ngokuthi banikwe izilamba ezishushu kunye noobhaka abagcwele oopopayi.
Inqununu yesikolo uNskz Noloyiso Mgwili ibizigobha amacala ivuyiswa leliphulo lihle kangaka, uzityande igila utyatyadule wathi “Inene imvula iyana nasentlango, besingayilindelanga noko lena into, ndiswele amazwi wombulelo kodwa u”ENKOSI” ligama elikhulu okwethu njee kukuthi maz’ enethole kakade amathole anyongande kukudlelana, Nangamso”.
