O.R TAMBO – Umbutho weqela lezopolitiko weEconomic Freedom Fighters(EFF) kwiphondo leMpuma Koloni uthe gqolo ukuphanda ubuqhophololo norhwaphilizo oburhanelekayo kuMasipala wesithili saseO.R Tambo.
Kuphando lwabo kukho nenkampani ebizwa ngokuba yiTulsaspark, yinkampani esebenzisana noMasipala. Le nkampani lindiwe ndii ngamarhe nezintsolo zokuba yaxhamla kwithenda(Tender) exabisa izigidi zamaRandi kuMasipala, kwaye kukho namaqithi-qithi ewafuna kuloMasipala ngokungekho semthethweni.
Ibikhe yatyunjwa ukuba iqokelele ilindle, kodwa endaweni yalonto yathatha izithuthi zikaMasipala ngokungekho semthethweni yasebenzisa zona emveni koko yayifuna apha intlawulo, kwaye iyifuna ngegqudu ingacenganga ndolala phi.
“Zizakulusiphula neengcambu zalo urhwaphilizo kwaye asizoshiya kwanto.
Le nkqubo yethenda(Tender) iwushiya uMaspala wethu elambatha kwaye ushiyeka womile”,uthethe watsho omnye wamalungu weqela leEFF apha ephondweni leMpuma Koloni.
Iqela leEFF apha ephondweni lithi urhulumente makahambele kude le neethenda(Tenders) kuba zizo kanye ezidala ubuqhophololo nokwehliswa kweemali zabarhafi.
